ឥរិយាបថសំខាន់ៗ៥យ៉ាងដែលបុគ្គលិកត្រូវមានដើម្បីក្រុមហ៊ុនជោគជ័យ

ដើម្បីឲ្យការងារទទួលបានជោគជ័យគឺទាមទារយ៉ាងខ្លាំងនូវការចូលរួមពីបុគ្គលិកម្នាក់ៗ។ គ្មានអ្នកណាម្នាក់ អាចរ៉ាប់រងការងារគ្រប់យ៉ាងតែឯងបានឡើយ បើទោះបីជា រូបគេជាមនុស្សពូកែយ៉ាងណាក៏ដោយ។ ក្នុងស្ថានភាពនេះ បុគ្គលិកម្នាក់ៗត្រូវតែប្រកាន់ភ្ជាប់នូវឥរិយាបថ ល្អដើម្បីឲ្យបរិយាកាសនៅកន្លែងមានសភាពប្រសើរ ព្រោះដូចដែលបានដឹងហើយ សកម្មភាពរបស់បុគ្គលិកម្នាក់អាចមានឥទ្ធិពលលើការងាររបស់បុគ្គលិកផ្សេងៗទៀត។ ដូច្នេះ ដើម្បីឲ្យបរិយាកាសការងារមានលក្ខណៈល្អប្រសើរ និងងាយធ្វើឲ្យក្រុមហ៊ុនមានការរីកចម្រើននោះ បុគ្គលិកត្រូវប្រកាន់នូវសកម្មភាព ឬ ឥរិយាបថវិជ្ជមានមួយចំនួនដូចជា៖

១) ញញឹម និង រាក់ទាក់ ( Smile and be Friendly)
ការញឹមដាក់គ្នាទៅវិញទៅមក គឺជាចំណុចសំខាន់បំផុតនៅកន្លែងការងារ ព្រោះវាបញ្ជាក់ អំពីការរាក់ទាក់ និង ផ្តល់ភាពរីករាយដាក់គ្នាផងដែរ។ គ្មាននរណាម្នាក់ មានអារម្មណ៍ល្អឡើយ ប្រសិនបើឃើញអ្នកដទៃមានមុខស្អុយ នៅកន្លែងការងារ។ ដូច្នេះ ដើម្បីឲ្យការងារក្រុមមានដំណើរការទៅយ៉ាងរលូននោះ អ្នកគួរតែចេះផ្តល់ស្នាមញញឹមដាក់គ្នាទៅវិញទៅមក បើទោះបីជា ស្ថិតក្នុងស្ថានភាពណាក៏ដោយ ព្រោះស្នាមញញឹមបង្កប់នូវក្តីសង្ឃឹម ដើម្បីអាចតស៊ូជាមួយការងារលំបាកៗ។

២) កុំនិយាយកុហក (Don't lie)
ដើម្បីសាង និង រក្សាបរិយាកាសល្អនៅកន្លែងការងារបានយូរអង្វែងនោះ បុគ្គលិកម្នាក់ៗគួរតែជៀសវាងការនិយាយពាក្យកុហក ព្រោះគ្មាននរណាម្នាក់ចូលចិត្តមនុស្សនិយាយកុហកឡើយ។ ការនិយាយពាក្យពិតនៅកន្លែងការងារ គឺជាការសាងភាពជឿជាក់មួយដ៏សំខាន់ ព្រោះបើគ្មានភាពជឿជាក់នោះទេ ដំណើរការនៃការងារក្រុមប្រាកដជា មិនអាចដើរទៅមុខប្រកបដោយភាពជោគជ័យបានឡើយ។

៣) ការទទួលខុសត្រូវ (Responsibility)
ដើម្បីឲ្យការងារជាក្រុម ដើរទៅមុខ និង អាចដោះស្រាយពេលជួបបញ្ហានោះ ទំនួលខុសត្រូវរបស់បុគ្គលិកម្នាក់ៗ គឺជារឿងសំខាន់មិនអាចខ្វះបាន។ ប្រសិនបើបុគ្គលម្នាក់ មិនចេះទទួលខុសត្រូវ មានន័យថា រូបគេមិនអាចធ្វើការងារអ្វីមួយឲ្យអស់ពីលទ្ធភាពនោះទេ ព្រោះបើទោះបីជាមិនសម្រេចក៏មិនខ្វល់ ប៉ុន្តែបើមនុស្សដែលមានទំនួលខុសត្រូវវិញ គេមិនអាចធ្វើអ្វីមួយដោយការធ្វេសប្រហែសនោះឡើយ ព្រោះមិនដូច្នោះទេ គេប្រាកដជាមានអារម្មណ៍មិនល្អ។ ជាពិសេសនៅពេលដែល មានបញ្ហាកើតឡើងម្តងៗ ប្រសិនបើបុគ្គលិកម្នាក់ៗគ្មានការទទួលខុសត្រូវទេ ពួកគេនឹងទម្លាក់កំហុស ឲ្យគ្នាទៅវិញទៅមកមិនខាន។ ដូច្នេះហើយ គួរណាតែធ្វើជាមនុស្សដែលមានទំនួលខុសត្រូវម្នាក់ ព្រោះវាជាតម្លៃដ៏ចាំបាច់មិនអាចខ្វះបាន។

៤) ផ្តល់តម្លៃទៅកាន់មនុស្សជុំវិញខ្លួន (Give value to others)
បើទោះបីជា អ្នកជាមនុស្សពូកែ និង មានតួនាទីខ្ពស់ជាងគេក៏ដោយ តែការផ្តល់តម្លៃឲ្យអ្នកដទៃ គឺជារឿងដែលមិនគួរមើលរំលង។ ការសាងភាពជោគជ័យនៅក្រុមហ៊ុន ពិតជាមិនអាចកើតឡើងឡើយ ប្រសិនបើមនុស្សម្នាក់ៗ សុទ្ធតែមិនផ្តល់តម្លៃឲ្យគ្នាទៅវិញទៅមក ហើយគិតថា ខ្លួនសំខាន់ជាងគេ។ ការផ្តល់តម្លៃឲ្យអ្នកដទៃ គឺបង្ហាញថា បុគ្គលិកម្នាក់ៗនៅកន្លែងការងារ គឺសុទ្ធតែសំខាន់ និង មិនអាចខ្វះបានជាដាច់ខាត ដើម្បីសម្រេចភាពជោគជ័យអ្វីមួយ។

៥) ជួយគ្នាទៅវិញទៅមក (Help each others)
វប្បធម៌នៃការជួយគ្នាទៅវិញទៅមក ត្រូវតែសាងឲ្យបានជាដាច់ខាតនៅកន្លែងការងារ។ ការជួបប្រទះនឹងបញ្ហា គឺជារឿងធម្មតានោះទេ ដោយពេលខ្លះអាចដោះស្រាយបានដោយខ្លួនឯង តែពេលខ្លះទៀត ពិតជាត្រូវការការជួយជ្រោមជ្រែងពីមនុស្សជុំវិញខ្លួន។ ដូច្នេះនៅពេលមានបញ្ហាកើតឡើង សមាជិកក្រុមម្នាក់ៗ គួរណាស់តែជួយដោះស្រាយគ្នា បើទោះបីជាវាមិនស្ថិតក្នុងតួនាទីរបស់អ្នកក្តី។ គួរគិតស្មារតីក្រុមជាធំ ដើម្បីឲ្យខ្លួនអ្នកបើកចិត្តទូលាយក្នុងការសហការគ្នាទៅវិញទៅមក៕